Kea a 'wlʋɛ nyʋ o
94
Kea ‑mɔɔ ja nyʋ dɛsaʋn 'a ‑kao "kpei ɛ,Tʋ "bo, Kea, ‑mɔɔ ja nyʋ dɛsaʋn 'a ‑kao "kpei ɛ, ‑ɩn ji 'ʋn o.
2 'Oo ‑mɔ, 'blʋa 'a 'pee 'jei‑,
‑ɩn ‑sɔn 'ʋn, ‑ɩn ‑je ji,
‑wɛe ‑cɛ" "i 'bɛʋʋn 'a dɩ ʋʋ nʋa 'a,
‑ɩn ‑je ɩa' ‑kao ʋʋ "kpei ja‑.
3 Kpɛ ‑tiiɛ' 'diwɔnyniʋn, Tʋ "bo,
kpɛ ‑tiiɛ' 'diwɔnyniʋn 'je i "wan ‑o ke 'wlɛ ‑ɛ?
4 ‑Cɛi" 'bɛʋn ‑nʋ, wlu saɩn ‑nɩ 'de ʋʋ 'wɔn,
dɩsaɩnʋʋn ‑nʋ, ʋʋa na ‑cɛi" 'bɛɛa' 'ʋn.
5 Ʋʋa ‑tuɛ" ‑ma 'cɛ 'kle Tʋ "bo, ‑wɛe ʋʋa 'dbaa nyʋ ‑tea ‑ma ‑tea ‑tɩn' "i.
6 Ʋʋa 'dba 'dʋɩ ke,
‑tɩɔn" 'nynɔ ke "kwie ju 'mɛ.
7 Ʋʋa' 'sʋ a wluɛ ba ‑pee ka,
dɩ ‑aa nʋa Tʋ "bo sɩ 'je,
Sakɔbʋ 'a Kea 'a sie ɩ "jriɛ o.
8 'Kaa ao ‑tu" aoa' ‑cɛ" 'ɛ ‑tɩ' 'ao nyʋ ‑sea tɔ' 'di nɩɛ.
Ao nyʋ ‑ʋʋa dɛ 'mii wɔn 'a nɩa 'kle ɛ,
blaa "nɔ ao 'je tɔ' 'di 'kpaa‑?
9 Nyɔ ‑nʋa' doun" ɛ,
‑mɔ seɛ 'bɛɛ‑ ɔ 'je i 'wɔɔn?
Nyɔ ‑nʋa' "jri ɛ, ‑mɔ seɛ 'bɛɛ‑ ɔ 'je i 'jee?
10 Nyɔ ‑ɔɔ ‑tu" 'a 'blʋa 'snɩ,
seɛ 'bɛɛ‑ ɔ 'je nyʋ 'snɩ ‑tu"? Nyɔ ‑ɔɔ tɔɔa nyiɔ dɛɛ,
ɔ 'bɛɛ‑ ɔ 'je nyɔ ‑piaan" ‑piaan nɩɩ‑?
11 Tʋ "bo juuo tɔ' ‑nɩa 'de nyiɔ 'ʋn ɛ:
ɛ nɩɛ pʋʋɔ' ‑o.
12 Tʋ "bo nyiɔ ‑ma ‑cɛ" ɛ ‑tua" 'snɩ,
‑wɛe ‑ma kɛ' ɛ tɔɔ 'a dɛ,
ɔ nɩɛ 'e 'mʋa‑ 'ʋn,
13 'de ‑sɔn ‑tɩ "nmia ‑tɩ a muɔ 'jea a,
ɔ 'je tɔ' 'ɔ blua' 'je, 'kaa nyɔ ‑sea Kea juuo,
"bie ‑gbau" mɛ ‑ɛ ‑bluu" ɛ, de ɔɔ' ‑tɩ' 'ʋn.
14 Tʋ "bo se ɛɛ' 'cɛ 'bɔ i see.
Ɛ se nyɔ ‑nɩa ɛɛ' ‑nɩ nyɔ 'kpʋ "i to i.
15 Ke 'wlɛ, 'pee a muɛ 'jea' 'de "isrɛa' 'ʋn,
‑wɛenyʋ ‑ʋʋa pɛe "isrɛa' "i,
‑wee'‑ seɛ wlu 'de tba i.
16 ‑Ɔ ‑je 'ʋn o ji 'de 'diwɔnyniʋn "juɛi ɛ?
‑Ɔ ‑je 'ʋn sʋn o po,
'de nyʋ ‑ʋʋa nʋa dɛ ‑nynia "jrii 'a ‑tɩ' 'ʋn ɛ?
17 'Aa! ‑Bo Tʋ "bo se 'ʋn o sie 'de ɛ,
‑mɛ 'ɩn mu' 'ɩn je 'e mɛʋn o ‑kwlɔ nyni.
18 ‑Bo 'ma sea wlu 'ʋn "duo 'ɩn 'na:
'ma bɩ a jiɛ "i beea',
'de ‑ma nyʋ 'a ‑tɩ' kmaa' 'ʋn ɛ,
Tʋ "bo, ‑ɩn poɛ 'ʋn sʋn o.
19 ‑Ta 'ma naa dɩ ‑tuu" ‑tuu‑ tɔ' "kpei ɛ,
‑ma nyʋ 'a ‑tɩ' ‑kwlɩ' i ‑tu" 'a,
poɛ 'ʋn 'mʋa‑ pɛe o.
20 Nyʋ ‑ʋʋa 'jea' nyʋ 'a 'pee 'de "isrɛa' 'ʋn,
‑wɛe ‑ʋʋa blaa kɛ' wɔn ‑ʋʋa ja nyʋ 'kle "kpei ɛ,
'bɛɛ' 'mɛ ʋʋ 'je ‑ma 'beɔ kpatɛ‑ "kpei ‑tee?
21 Ʋʋa 'bɛɛ' wlu 'ʋn, ‑wɛe ʋʋ 'je nyɔ ‑srɛa" "i 'kmʋ ‑sa,
'de nyɔ ‑sea' dɛjrɛ' nʋ,
ʋʋa kpʋʋn ɔ 'pee ‑wɛe ʋʋ 'jeɔ 'dba.
22 'Kaa' Tʋ "bo mɔ ‑nɩ 'ma sro' 'wlaa na',
kɩɩn, 'ma Kea ‑nɩa ‑kliosou", 'ma 'wlaa "jru sro' ɛ.
23 Ɛɛ blua ʋʋa ‑cɛ" 'ɛ dɩsaɩn 'de ʋʋpʋ‑ "jru,
ɛɛ muɛ ʋʋpʋ‑ 'a ma" i ‑saa',
'de ʋʋa ‑cɛ" 'ɛ dɩ ‑nyniia "jrii 'a ‑tɩ' 'ʋn.
Kɩɩn, Tʋ "bo, ‑aa Kea, ɛɛ muɛ ʋʋ ‑wee'‑ "klein i ‑saa'.